自從上次試過馬灣兩天遊之後，上左癮，原來香港都有好多玩法ｏ既。
適逢priceline做暑假promotion，天水圍嘉湖海逸，周末入住都只係$391，真係好抵喎！香港２天遊，在香港都住酒店，一來有去旅行的感覺，二來又可以促進香港旅遊業XD
今次主題是：「天水圍元朗２天遊」
天水圍最出名ｏ既景點莫過於濕地公園，不過今次我地冇去，是關我地懶訓，同埋兩日都落雨。
於是我地就改變策略，睇戲同周圍食。
哈，２日入面食左好多好野，揸住張地圖周圍去，好似自由行咁！
最搞笑係一到步，就有人前來問路。
男人：「請問你知唔知嘉湖銀座係邊架？」
Ａ先生：「我地都係第一次ｏ黎架乍」
香港人問香港人，真係好好笑，大家都係大鄉里出城咁。
對於九龍人同香港人ｏ黎講．．．第一次ｏ黎，真係會俾依個「輕鐵路線圖」嚇親
除左住在天水圍之外，我地食同玩都主要在元朗。
原來元朗有好多好野食，同埋有好多好多好多人！
條路好窄，ｄ人又多，感覺好似行旺角咁。
我地今次旅程食左泰國野，台灣野，同埋意大利粉，真係大飽口福。
依間野真係好多人食，座無虛席。湯底真係真材實料，冇味精，不過我喜歡雞湯多過牛肉湯，略嫌它唔夠甜味。雞扒真係唔錯，又夠大碟，真係好抵食！至於金錢肚，味道幾好，不過唔夠爽口。
依間泰國野係泰國人開的。openrice找不到的，是同事Ｓ介紹我食的，位置在小茄子隔離。個生蝦刺身$58，份量都幾多，都幾好食架我覺得，最正係個汁。個冬陰功就真係好麻麻，味道唔正宗，又是有落蕃茄的，同埋唔夠辣。個咖哩炒海鮮，其實原本想食炒蟹架，但因為蟹賣晒所以先叫海鮮。咖哩汁好正，海鮮有青口，蜆，魷魚，蝦等，用來點蒜蓉包就最正！另外我地要特別讚下個waitress幾體貼，A先生點名嘉許。佢俾多張枱我地放餸，佢行過順風耳聽到我地話ｄ蜆唔熟又問我地洗唔洗兜番熱佢，同埋佢見我睇電視，佢執緊野都行企過隔離，怕阻住個電視，笑容又親切，廣東話一流。
依間意粉小白屋，睇佢平平無奇，原來個白汁蜆肉意粉好食到你唔信！個汁好鮮甜，吸收晒洋蔥同蒜蓉ｏ既甜味，又有蜆ｏ既鮮味，意粉彈牙，口感一流。反而個牛扒就差ｄ哪，冇錯係好大塊，肉質不賴，不過味道未如理想，個薯蓉都唔好味。依兩個係set lunch o黎o既，跟餐有湯同蒜蓉包，個湯麻麻又細碗，但係個蒜蓉包好好食，同埋杯餐茶凍朱古力幾好飲。四十幾蚊一個餐，有咁ｏ既質素，真係唔錯！(我講緊個白汁意粉)
講完食，講玩。
台灣野附近有間寵物店，見到隻貓貓好靚。
佢仲識望鏡頭，真係乖^^
廂入面有3隻貓，佢地各有不同性格。
黑色紋果隻貓貓隻前腳超級短，唔知係咪有問題呢？不過佢好活潑，周圍撩人玩，但係佢成日俾其他貓蝦好可憐。
白色果隻貓貓好霸道，佢訓住ｄ貓砂唔俾其他貓侵佔，當黑紋貓貓想走入去，白色貓貓就會出爪攻擊，靚女貓貓都唔敢惹佢。
黑紋貓貓好鍾意玩靚女貓貓條尾，但係每次佢搞親佢條尾，都會被靚女貓貓攻擊。
我地就咁同幾隻貓玩，又消磨了半小時。
然後我地逛左元朗最出名ｏ既千色廣場，地庫有間機鋪。
表面上係遊戲機中心，但係入面有一半的game都看似是賭場game，有老虎機，跑馬機，俄羅斯輪盤等，差在ｄ代幣冇得兌番錢ｏ者！
之後我地去左三聯打書釘。這是我和Ａ先生最愛的活動。
講完玩，講下住。
今次入住嘉湖海逸酒店，我地都係住超高層，不過此高層不同彼 (如心酒店) 高層。26樓同60樓個景係唔同ｏ既～
但係望住天水圍公園，個景都幾靚～
夜晚公園會著起零星的燈泡，好似星星咁，好靚架！
跟住等我地好朋友鴨仔為大家介紹下房間ｏ既設施
鴨：「張床好舒服呀，不過個枕頭好似扁左ｄ」
鴨：「原來依度有得煮野食，不過要自己帶煲。今餐就食住『紅燒小鴨』先啦」
鴨：「仲有微波爐，食宵夜都冇問題！」
第二日o既活動係睇<<冰河世紀3>>，套戲幾好笑，好睇～
總括而言玩得好開心，美中不足ｏ既係成日落雨。
ｄ雨係針對我地ｏ黎落架，每次都咁橋，我地在室內，就天晴，我地一踏出室外，就開始落，越落越大。有冇咁巧合呀？？？
今次ｏ既「天水圍元朗２天遊」報告完畢！
下次再去第二度玩，一於玩盡１８區，呵呵呵～
已經看過的朋友，可以再回味啊^o^
