花園夜市開放時間：逢星期四、六、日（晚上）
我地係星期六晚去的，睇完日落就坐的士去夜市，當時大約下午五點半左右，的士司機話夜市已經開左。我地逛下食下(主攻食)，大概行到七點幾八點就閃。感覺真係唔錯，好多特色小食，而好多都係第一次見，在其他夜市未見過的。Ｋ先生好雀躍咁帶我周圍試。
花園夜市街頭小吃
何佳佳蔥油餅
舐舐脷指數: ★★★★★
花園夜市第一檔，Ｋ先生一見到就問：「我可唔可以食呀？」當然可以啦，不過當時心諗：蔥油餅之嘛...有咩咁特別呀？之前喺宜蘭都食過好出名嘅蔥油餅，係好香，但都係唔夠香港果ｄ好食。Ｋ先生買完就問我試唔試，望下個樣，咦，有ｄ唔同喎，上面曬左ｄ椒鹽味粉，咬一啖，好好味呀！
林桑臭豆腐薯條
舐舐脷指數: ★★★★
好得意，以前未食過依ｄ。臭豆腐同薯條都食得多，Mix埋都係第一次見。其實佢係將臭豆腐切成條狀再拎去炸，外脆，裡面保留返豆腐嘅質感，淋淋地，加埋ｄ味粉，都幾好味，可以一試。
冠軍木瓜牛奶
舐舐脷指數: ★★★★★★
超好飲的木瓜奶，忍唔住俾多粒星，唔太甜(佢聲稱冇落糖同埋同靚鮮奶)，飲到啖啖木瓜香，我地忍唔住飲左三杯！
天玥胡椒餅
舐舐脷指數: ★★★
見到好多人排隊，同埋好多訪問，期望好大，胡椒餅即叫即炸，非常新鮮，但熱辣辣，小心燙口。裡面好多肉汁流出嚟，好正，幾好味嘅，不過我同Ｋ先生都覺得唔夠第一次食「帝鈞胡椒餅」時震撼。新鮮嘅帝鈞好食ｄ。
釣蝦
有趣指數: ★★★★
台灣夜市流行小玩意，通常都係撈金魚，但係花園夜市竟然有釣蝦，好搞笑！釣到可以即刻去隔離ＢＢＱ燒嚟食，有得玩又有得食，過癮。
二師兄魯味
舐舐脷指數: （不祥）
路經人頭湧湧的店子，出名魯味。見佢ｄ魯味顏色深啡有光澤，好似好入味。是祖傳秘方炮製，有興趣可以一試。
澎太郎炸飯團
舐舐脷指數: ★★★
日式飯團外面包住粉漿炸到脆卜卜，再淋上美味醬汁。
炸雞翅飯
舐舐脷指數: ★★
唔記得左影相...花園夜市有幾家烤雞翅飯的，我地試左有紅燈籠果檔。賣相好ｏｋ，但食落有點怪怪的，個飯係用糯米，雞翼又唔係好入味。
德國香腸脆皮熱狗
舐舐脷指數: ★★★
Ｋ先生最愛吃這種脆皮熱狗，見到就嚷著要試。點了墨西哥辣醬，原來辣到噴火，Ｋ先生食到流晒汗，最後頂唔順投降。味道ＯＫ，只係揀錯汁啫。
潘荖濃碳烤玉米
舐舐脷指數: ★
花園夜市近門口的檔，中伏了。古老味個汁好奇怪，佢話係燒汁但唔似平時食開果ｄ，同埋條粟米唔甜架，仲燒到好硬......本身好鍾意食粟米但係真係食唔落去。
夜市周邊
 |
| 依檔幾吸引，好似係西班牙海鮮飯（大鍋版） 但去到嘅時候仲未煮好，所以冇試到 |
當日唔知係咪有咩喜慶事，隔離上空不停見到煙花。
我地只係行左兩粒鐘左右就離開，結論係「花園夜市」真係好正。
話時話，兩個人嚟講戰鬥力都算低。我發現走嘅時候數返原來只係食左好少嘢。
沒有留言:
張貼留言