北京凍到震之旅 Day2b (南鑼鼓巷)

Day2　(2009.12.25)
行程: 長城->南鑼鼓巷->西單->鬼街

去完長城，下一站係南鑼鼓巷，遇著塞車時間，塞左９個字先到。

一落車，就看到「南鑼鼓巷」四隻大字，終於來到了！

來北京之前，做了許多資料搜集，一直好期待南鑼鼓巷這條街。
不過來了幾日，我發現南鑼鼓巷並不是最吸引的，論好行，她不及前門大街寬闊乾淨，論特色，又好像不及煙袋斜街。雖然講到胡同就稱不上，因為全都是因為奧運而翻新了的遊客區，欠缺了老北京的味道。

時間太少，只能走馬看花，合眼緣的便進去逛逛

特色小店多，一塊尋寶地

有些店子出產自家品牌產品，發揮創意，倒是有心思的。
不過我們欣賞的多，買的少。

內有許多鐵皮懷舊玩具，欣賞味濃！
可惜老闆娘唔俾我影相，同唔到大家分享添～

興穆手工，是幾位年輕人開設的小店，
勁多分店，街頭街尾都有，總店在煙袋斜街
專售牛皮紙筆記簿，特色搪瓷水杯，布袋麻袋錢包等等
設計有特色，唔買都睇下丫
www.craftxm.com

食草堂是賣手製皮具的，手工唔錯，不過幾貴

北京的雪boot好平，質地暖過我果對又厚d，
有一對香港賣$400的，一模一樣，都只係￥2XX
可惜香港冇乜機會著，如果唔係我都有興趣買番對！

行呀行呀，終於來到文宇奶酪店

我好喜歡吃奶酪的，所以一直好期待來這裡，
不過可惜來遲了一步．．．奶酪已經賣晒了．．．
結果要左雙皮奶，都好，又係「賣飛佛」！
點了兩個味道，紅豆味和燕麥味。

紅豆粒粒原整，質感比較硬身，鍾意食紅豆o既人應該好鍾意！
不過我地都對燕麥味比較有興趣！燕麥同雙皮奶非常之夾，甜度適中好軟滑，我鍾意！
兩碗雙皮奶不消５分鐘就被我地消滅左！
其實真係幾好味，可惜加晒價！雖然￥９仲係好平
臨走前，我見對面對姊弟買左奶酪乾食，我好想試，於是又買左一盒，￥１６，好貴，依個加得最離譜￥１０加到￥１６

『糖加奶炒製而成，甜而煙韌，故又稱「宮廷太妃糖」(Toffee)』我好鍾意食拖肥架，講到好好味咁，
不過放入口，發現都唔係果回事！
味道有d似芝士o既，不過就唔煙韌，食左一粒我就唔想再食了。好浪費呀．．．
早知叫對面個姐姐請我食一粒啦>_<

酒吧食店臨立

南鑼鼓巷除左特色店子多，還有cafe多，酒吧多，餐廳多！
在這裡逛累了，不愁冇野食。
夜晚o黎食度搵間cafe歇下，傾下計上下網，都係一件賞心樂事。

台式小食

法式可麗餅（其實應該都係台灣傳入的）

這個酸奶應該冇人唔識，本本旅遊書都有介紹
一場o黎到一定要試，不過唔係而家

西藏o既代表

印度o既代表

一睇就知食中國菜啦

過客酒吧，又係勁出名，早在南鑼鼓巷未變成旅遊區之前，佢就存在
老闆是浪遊人，曾到西藏旅遊，然後回來番便和女朋友海燕開設了這間cafe，
希望讓背包客有個聚腳點，一起交流分享。
很想入去坐下，不過冇時間．．．連「過客」都做唔到！
跟沒錢旅行和沒時間旅行的思想還要進行長期的鬥爭
www.passbybar.com / www.过客.com

北京最小的酒吧，只得１２平方米
很有趣，好想知道入面係點

腳底按摩都有，行到攰都唔怕啦

不知不覺就行到街尾，要走了！
因為要趕去海底撈火鍋店，訂左七點半呢！
在街尾截的士，截左半個鐘都截唔到:(

西西友誼商場＝西西友誼酒店？

去到西單，尋找西西友誼商場，邊度？睇地圖，只見到西單商場，西西友誼酒店，卻見唔到「西西友誼商場」
問途人，遊客問遊客，「我都在找啊」哈哈
再問另一個當地人，她冷漠地回應一句：「我不知道」，一個笑容也沒有，再一次令我感受到北京人的冷漠。
後來憑我們的機智聰明，上西西友誼酒店搵啦！
原來西西友誼商場即係西西友誼酒店，係邊個寫個咁o既地址架？搵死人咩！

西西友誼酒店部lift係唔可以直接上７樓的
上８樓之後問reception，佢教你行一條通道去搭另一部lift，先至落到７樓架

好彩趕得切！入到去，聞到好香，但係同時，
一個壯觀o既畫面收入眼簾------好．多．人

冇錯依個係門口
．．．唔好同我講佢地等緊位呀？
好彩我有訂位o者！我真係醒，呵呵呵！
當我還在沾沾自喜的時候，侍應帶左我入去，搵個位俾我地坐，不過唔係飯台，係櫈o者！然後佢俾左張飛我，講左一堆埋我聽唔明o既話，就走左了。

即係點？
望下而家叫緊個號碼，再望下自己張飛o既台號，唔係卦？

即使入到去，都仲有好多人等緊位

有一個現象真在太有趣，唔同大家分享唔得！
見唔見到佢地打緊機？

冇錯呀，依度o既等位服務真係一流！出面有過百人等緊，你會有位坐，有豆漿熱茶飲，仲有nuts食，有樣野你仲估唔到，就係有人玩波子琪﹑捉圍琪！我咁大個女都係第一次見有餐廳咁做，最搞笑係：竟然有人肯等！佩服佩服！
如果香港食飯要等百幾張台，我諗應該冇乜人會等。

望下張卡背面，原來有咁多分店o既！

我地坐左大半個鐘，都仲未有人安排我地入坐，我訂左位架！
然後我問人，果個人就俾左張menu我點菜，佢好似膚衍緊我地。

張menu都幾多野食，同埋唔貴架，唔怪得咁多人
（想睇下有咩食，可 click 圖放大）

點完哪，咁又點？
望下隻錶，８點３了，足足等左９個字
再叫個友善ｄo既侍應問，再完佢邊個湯底好﹑邊個送好食之後，再問
我：「請問這張飛的號碼跟那個號碼有沒冇關係？」(我指著右手面的號碼燈)
侍：「有的．．．」(她帶點尷尬的笑)
我：「下？等200張台？我訂了座的！」
侍：「不好意思，因為今天過節，人比較多，我們都在盡量安排坐位了」
我：「請問我們還要等多久？」
侍：「這個我都不能確定，你的號碼現在大概還有４０張台左右吧」
我：「下．．．４０張台？？？」
我投降了！如果她一早告訴我要等咁耐，我就一早走左去第二度食，計埋等的士來的時間，足足sai左我地兩個幾鐘！
早知我地去南鑼鼓巷食，仲開心，去什剎海夠好啦～
不過算啦，每次都總會有意外發生！結果我地搭的士去鬼街，貪果度多野食～
旅遊書介紹過小青島食海鮮好正，打電話去又話有位，就依間啦！

一上車，的士司機問我地係咪食完麻辣火鍋，因為我地身上有好大陣麻辣火鍋味
佢以為我地o岩o岩食完，又去鬼街再食ＸＤ
哈哈哈哈．．．真係笑死我地
依個司機幾好傾，又好好人，佢推介我地食麻辣火鍋，叫A先生衝破心理關口試下食涮羊肉，仲話對男人好添
他說：「經過紅湯(麻辣湯)一浸，羊肉的騷味就冇晒～試試看吧！」
A先生半信半疑，「好啦！」
後來佢推介金重慶俾我地，於是我地就唔食小青島，改食麻辣火鍋。

見部車好靚所以影下：ｐ

麻辣火鍋，以前舅父帶我去東莞小肥羊食過一次，
不過我都係試過味，即係食一兩舊就投降。
今次係A先生第一次試，佢抱著戰戰兢兢的心情。
發現菜單好多送我地都唔知係咩，平時香港食開果d又冇喎～結果半問半點之下，就點左以下o既送。

穩陣起見，都係叫個鴛鴦鍋好d。
不過又估唔到，中間果個養生湯底，正到不得了！
杞子，人參，味道濃郁，用佢o黎滾食物，唔洗點任何野都充滿鮮味！

至於個麻辣火鍋，佢地叫紅湯，已經少辣左還是辣到跳舞！
不過神奇地，真係經紅湯浸過o既羊肉都變得唔騷。
不過真係好辣，除左辣味，就好似食唔到食物本身o既味道。
所以食左一陣，我地都投降，轉投清湯的懷抱。

要一讚是這家店子的服務態度好好，佢地員工食緊飯都會走過o黎幫我地手，
又會話我地知d醬油邊度溝，走o既時候又問我地d野好唔好食，總括o黎講俾我感覺是熱情的

店內一棵唔靚的聖誕樹

打完邊爐成身慶合合，諗住出去一定暖返d，點知...我錯了！
半隻腳踏出街外，一陣寒風立即迎頭撲上
我們拿拿臨截的士返酒店。

夜晚酒店餐廳有歌手獻唱，不過最但消費每位￥５００!
果然係有錢人消遣o既地方...

靚酒店當然要好好享用一下佢o既設施啦！
舒服晒～～～

下一篇

北京凍到震之旅 Day3a (天安門+故宮)