上次講完酒店，今次講下交通先
祈福來往長隆的交通
因為今次住祈福，我就講下祈福來往長隆的交通。
上年去剩係識得打的，來來回回下下都幾十蚊，都幾融！不過上年我地５個人，所以除番開都好化算～但係今年得２個人去，下下三四十蚊真係好貴！去程我地係搭的士，在祈福巴士總站可以截，或者坐私人兜客果ｄ車都得，傾ｏ岩價錢便可上車～不過都有個危險性．．．點知會唔會上錯賊車！？所以我建議人少都係唔好博～
第二日我地去左水上樂園，揀左搭的士。由祈福去長隆水上樂園搭的士＄３０，不過由於我地駛到入水上樂園正門落，所以加＄１０。（入長隆範圍要俾過路費）
去到水上樂園，職員話我知離開有免費穿梭巴士去漢溪長隆地鐵站，幾好喎！
上年水上樂園新開的時候，仲未有穿巴服務的，而家真係方便左好多～
這個穿梭巴士，是循環線，不停來回長隆多個不同景區。
搭穿巴到漢溪長隆站下車，你會見到有個地鐵站口Ｅ
落去經地鐵隧道過對面馬路
地鐵站好新淨，好光猛，格局同香港地鐵站好似
找Ａ出口，上左地面，會搵到一個巴士站，１０Ａ及１０Ｂ
兩部車都會經祈福新村，不過１０Ｂ會較快，因為少幾個站。
車廂座位都算舒服，車費都係＄２，超值！
聽聞依兩條線係今年新開的，我估係為左遊客而設，幾貼心ｏ既服務丫～
今次旅程真係開心大發現！
＄２就可以去長隆，來回都係＄４，慳番ｄ錢可以食好ｄ
ＢＢ實用小Ｔｉｐｓ
１）如果搭的士去，司機可能去到漢溪長隆地鐵站就放低你，因為入去要俾多＄１０，但你千祈唔好制！因為由漢溪長隆地鐵站行到去水上樂園路程很遠的，我上年行過一次，真係好甘！不過如果你唔介意耐ｄｏ既．．．可以照在地鐵站落，然後等穿梭巴士。
２）１０Ａ及１０Ｂ的巴士站位置好當眼，在祈福巴士總站問人就得，每位＄２，請自備零錢。
沒有留言:
張貼留言