端午節的3天黃金假期, 我同小A去左番禺玩~
上年已經去過一次o既我, 今次就作嚮導, 帶小A去見識下, 哈!
首先講下酒店先~
番禺錦繡香江俱樂部
上年我係住番禺錦繡香江俱樂部(標準4星)
果時有個package勁抵,
Package-----------------------------------
$288包
．豪華房 x 一晚 (佔半房)(價值$500),
．長隆歡樂大馬戲門票 x 1(價值$120),
．酒店早餐 x 1(價值$25),
Package----------------------------------
今年所有門票都加晒價, 冇左依個優惠, 不過多左好多其他唔同o既package, 動物園歡樂世界大馬戲都有! (最新消息: 而家連水上樂園都有套票!!! 超筍)
但係咁筍o既優惠唔係人人知, 得一個網頁有得訂, 詳情之後再講~
祈福大酒店
今年我就住位於祈福新村o既祈福大酒店(標準3.5星)
本來諗過住番錦繡香江o既, 但因為佢冇水上樂園package, 而且附近冇野行
祈福酒店附近有條好出名o既祈福食街, 好多野食, 而且平靚正! 附近仲有超市同便利店添!
祈福5月1日~6月30日推出左個優惠package, 格過價之後都係覺得祈福抵d
Package-----------------------------------
$588套票(假日$638)包
．雙人普通房 x 一晚
．早餐 x 2,
．自助晚餐 x 2,
．按摩60min x 1,
．祈福農莊套票 x 2
(升級至豪華房+$50)
住多一晚都係 $400連早餐(豪華房$430)
Package-----------------------------------
我地係有升級豪華房的, 張床有7~8呎, 超級king size, 4個人訓都得!
酒店房間都幾乾淨, 衛生程度ok架
優惠期有限, 欲訂從速!
長隆酒店
如果想住得奢華d o既...長隆酒店絕對係一個選擇, 標準5星, 公價要成千蚊晚, 即使透過網上訂都要$780一晚!!! 不過好處就係住得舒適, 玩得舒適, 周邊就係長隆歡樂世界, 長隆水上樂園, 長隆國際歡樂大馬戲, 香江野生動物公園, 仲有免費穿梭巴士接駁所有樂園, 非常方便~
至於訂酒店網頁方面...我有兩個比較可靠的推薦俾大家
Resource------------------------------------------------------------------------
517旅遊網
http://www.517free.com/zh-tw/index.asp
517旅遊網, 好處係booking可以透過e-mail來confirm
當你submit左之後, 系統會立即send個e-mail俾你
之後有個專人會幫你跟進訂單, 好有效率, 而且有求必應, 你有甚麼特別要求/問題都可以在e-mail裡提出, 非常方便!
依個網頁o岩晒d普通話唔叻o既人, 我用過幾次都冇問題^_~
你可能會問, 咁網上訂酒店洗唔洗俾$$? 答案係唔需要~
普遍訂網都係櫃台前付款的, 所以可以放心
51766
http://www.51766.com/www/area_hotel/
另一個網, 51766, 我都覺得都幾好, 佢有d獨家酒店係517旅遊網沒有的(例如錦繡香江)~不過依個網係會有專人打俾你confirm訂單, 有時說廣東話, 有時說普通話, 不一定
所以要有心理準備~
好處就係夠快捷, 尋晚訂落, 今朝就有電話, 咩都電話交代晒便可了!
Resource------------------------------------------------------------------------
BB溫馨小tips:
Tips------------------------------------------------------------------------
-國內酒店通常門市價同網上價都會有一大段出入, 有時大時大節酒店仲會臨時加價不另行通知
-無論e-mail定電話confirm都好, 要問清楚價錢係咪同你訂o既一樣, 某d酒店多住一晚佢報價會貴左, 所以都係格清楚先好訂, 唔好俾人搵笨呀!
quote埋條links俾你地先~
1) 錦繡香江可透過51766訂
((拉落d就會見到好多唔同o既package(酒店+門票)套票))
http://www.51766.com/img/gzjjclub/
2) 長隆及祈福酒店可透過517旅網訂
http://www.517free.com/zh-tw/htl_search3.asp
-祈福酒店
http://www.517free.com/zh-tw/htl_search2.asp?k=gz4qfjd
-長隆酒店
http://www.517free.com/zh-tw/htl_search2.asp?k=gz5cl
Tips------------------------------------------------------------------------
好~今次介紹住咁多先, 下次再講下交通同美食
請間祈福近動物園 ? 交通又如何 ? 套票 ?
回覆刪除[版主回覆06/22/2008 23:49:00]祈福距離長隆都幾近, 5~10分鐘車程左右 打的過去要$30~40, 如果想平d, 可在祈福巴士總站搭10A/10B巴士, 在長隆漢溪地鐵站落車, 然後透過地鐵隊道, 去E出口, 一出地面就會有免費穿梭巴士前往動物園 套票方面, 如果你一次過玩幾樣野, 會平D 例如動物園要$150, 大馬戲要$150, 分開買要$300 如果動物園+大馬戲就只需$210 仲有好多其他組合, 詳情可參考: 長隆官網 ( 有晒成個度假區，包括咁多個樂園既資料 ) http://www.chimelong.com/SubCompany/?s=10
517旅遊網 真的可靠? 我通常用 mangocity + ctrip + elong
回覆刪除[版主回覆07/12/2008 12:30:00]我用過幾次都冇問題, 覺得都幾可靠架~
http://www.51766.com/www/area_hotel/ 我想係定 長隆酒店, 點訂同 唔知係點過數ge呢?
回覆刪除唔該!!!!
[版主回覆09/10/2008 00:43:00]你去 http://www.51766.com/www/area_hotel/ , 揀廣州, 然後揀埋番禺, 跟住按下面有個橙色「開始搜尋」。 等一陣...你就會去到番禺區酒店o既page, 一共有4頁。 你按next去下一頁(2/4頁), 就會見到 广州长隆酒店 ★★★★★, click入去, 揀選你想訂的房間, 填好d資料, 即晚/第二日就會有專人聯絡你confirm booking~(有可能說普通話/廣東話) 如果沒有問題, 他就會幫你紀錄低, 旅程當天台前付款就可以了~
我在517網內找不到祈福優惠package,係咪冇喇?
回覆刪除[版主回覆09/22/2008 23:57:00]我睇過, 暫時果個優惠冇左哪~~ 而家得番：9月1日~10月13日特惠公寓套票 公寓套票內容： 1、免費使用公寓會所或俱樂部會所泳池、設備齊全的健身房； 2、享用各公寓內的西式早餐； 3、享用俱樂部會所保健沐足 4、9月14日至10月13日贈送曼克頓西餐廳精美西餅一盒； 5、此套票以每套公寓計算，平日和周末同價。客人可以任意選擇三所公寓的其中之一入住。 我諗你可以10月13號再留意下有冇其他優惠^_~
想請教下........我地一家三口打算聖誕節去兩日一夜，主要只係去動物園，請問 "番禺錦繡香江俱樂部" 近唔近動物員？我睇地圖就好似響對面，唔知係咪？
回覆刪除另外，請問浴室有無浴缸？定只得花灑？
[版主回覆12/10/2008 10:05:00]你好呀, Snady~ 番禺錦繡香江俱樂部同動物園唔近的, 雖然睇地圖真係好近, 不過佢地中間隔左條大馬路, 所以部車要兜過去先到! 我同朋友以為好近, 試過行路過去, 點知行到一半都放棄左~ 如果你真係打算住依間, 其實搭的士都好快, 價錢大概$20~30左右。浴室有浴缸的
AABB,
回覆刪除真係唔該晒妳呀﹗
其實我已經響 517 訂左永成，不過後來先發現原來係無浴缸，因為有浴缸的話，個女沖涼會方便 d，佢又鐘意響浴缸玩水......睇黎我要換酒店~~~我之前有打電話去問過 "錦繡香江俱樂部"，原本有隻 package 係包雙套票(包兩個景點入場，rmb 988)，好抵，諗住book啦，點知佢話而家做唔到，只可做單套票(一個景點門票 x 2，rmb638)。其實價錢同book永成(rmb370 + 門票：300)差唔多 ~~~ 不過見妳介紹有好似好正咁..........唔知早餐係點呢 ~~~
我其實prefer 坐巴上祈福(總站)，我估大概都中午架喇，諗住響祈福街食左中午先，再去酒店 check-in，下晝去到動物園的話就去，唔係就第二日先去，去完就番香港咁 ~~~
唔好意思，咁多口水
[版主回覆12/10/2008 10:50:00]唔緊要~^^ 好多謝你講咁多野我聽~ 以我記憶...錦繡香江俱樂部個早餐好似係飲茶叫點心型式, 不過佢張早餐卷只包$25食物(唔係好sure...), 正常o黎講唔夠飽的~ 不過佢d點心都唔貴, 可以自己叫多幾樣點心~ 建議早少少去, 因為我之前太晏食, 好多食物都冇晒~ 錦繡香江個浴缸都幾大, 你同個女一齊浸都冇問題~~ 去到祈福食街, 不妨試下"手拉手" (由祈福食街行到最尾), 果度d野食又平又好味, 推介松子魚, 非常好食, 仲有個魚湯都好正, 好大煲, 真材質料, 我地5個人都飲唔晒 不過份量幾大, 你地3人可能會飲唔晒~ 去到動物園, 記得睇大笨象表演劇場, 好精彩的^^ 希望你地玩得開心啦^_^