第二朝, 我地又享用城市之星豐富又好味o既早餐~~
今日我又有整美味o既吐司
這就是「B小姐自製吐司」的玉照, 花生味(左) 朱古力味(右) 唔係講笑, 超好味!
食完早餐, 就走去附近郵局寄post card! 阿里山寫的post card, 來到高雄先寄, 哈!
可是......我又再一次遇上了不幸......>_<
點解台灣人咁懶架...成日都唔做野!
元旦可以連續放4日...我都想呀...
冇辦法之下...去左7仔, 公告紙話我知7-11有郵票賣
於是我地去左7仔買郵票再返o黎寄!
但問題o黎哪! 究竟寄返香港要幾多$$呢????
我問服務員, 佢地竟然唔知@@
於是我就以香港o既空郵價格兌番台幣係咁易貼夠錢就寄~
寄完postcard, 拿拿聲返去執行李check-out去下一站 - 旗津漁港。
去旗津半島, 要搭捷運去西子灣站, 再轉乘渡輪, 就好似我地去離島咁。
不過依個只係半島, 搭船話咁快就到。
去到西子灣站, 一落車, 就有人派租單車o既宣傳單張
有人租2人單車
還有摩托車可以租呢>v< 好吸引!
依度d人好興租完單車或者電單車之後就在西子灣遊車河, 或者連人單車搭渡輪過旗津漁港玩! d單車都好平, 幾十蚊就可以租一日~電單車都只係貴少少~~
本來有諗過租部電單車載A先生, 不過...因為我太耐冇揸了..而且A先生又重
, 所以最後都打消左個念頭, heehee
有宣傳版教你點樣用單車遊西子灣, 享受另類的旅遊體驗。
可惜我地冇咩時間...所以租完車, 就踩去搭渡輪。
估唔到碼頭咁多人......條龍好長
排到一半...先發現踩單車上船要排另一條隊的!
果條隊好得意, 係專for揸電單車同踩單車人士排的, 一個一個坐住自己部車, 連人帶車咁上船。技術不好的, 會落車推住車上船, 技術好的(或是懶的), 就會坐住部車上船, 個感覺好有趣的!
船上的景況
船好快就開了, 望著大海, 令人心擴神怡
對面有另一隻渡輪, 有些乘客還向這邊揮手
轉眼間便到達旗津半島
一下車, 覺得依度好似長洲呀, 適逢今日係台灣假期, 所以特別多人
第一站係去醫肚先! 旗津半島同長洲西頁等地一樣, 海鮮十分出名的~
咁一場o黎到, 我地梗係要去食海鮮啦!
揀o黎揀去...都唔知邊間好!
結果揀左依間! 個名係乜已經唔記得了, 只係記得...今餐...最好食o既, 竟然係碟橙=.=
真係令我們非常失望!
買海鮮時唔識講 (唔係我唔識國語, 而係唔知當地海鮮o既學名)
於是求其叫左幾樣我地識叫o既食物
d蝦冇味的! 又少...
旅遊書推介o既招牌菜, 旗魚肚, 好普通o者...
白灼螺, 以為白灼一定冇死, 點知冇咩味的...
依餐咁難食o既海鮮餐, 大家估下食左幾多錢??
答案係...9xx新台幣, 食左二百幾蚊, 就係俾d咁o既貨仔俾我, 回水呀!!!
依完飯, 我地又踏上單車之旅! 沿著大路一直踩, 好快就踩到來旗津海水浴場~
這個海灘都幾熱鬧!
經過這個路牌, 告訴我們前面就是星空隧道了
到底星空隧道係點o既呢?
裡面漆黑一片, 行到尾段, 出現了點點星光, 原來是十二星座圖呢~~~
很美啊!
從隧道走出來, 又是另一片光景
接著我們在沿海步道上踏單車, 迎風撲面, 暖暖的陽光洒在臉上, 感覺好爽!
有些人在釣魚
有些人在放風箏
後來我們到了一個地方, 有些梯級可步行至觀景台, 可惜我們有部單車纏身, 所以最後都冇上到去。再踩呀踩, 好快就踩左一個圈回到海水浴場。
踩左成粒鐘, 又開始口痕, 買了旗津最出名的小吃「燒魷魚」o黎食!
即叫即燒, 正呀!
依度真係人山人海呀...
食完燒魷魚, 好快又來到另一個「目標」! 叫「3Q麻糬」
我見好多人排隊, 心諗:「一定係好野!」, 所以就算條隊幾長我都要排! (師奶心態)
麻糬有多種味道的, 全部都係自家製! 每粒NT6蚊, 我一共買左6粒。
咬一啖, 軟綿綿又煙韌, 餡料超多!
如果你有睇過火頭仔昆布o既話...就可以想像到, 我同A先生食左粒麻糬, 就好似昆布食左好味o既野, 然後雙手按住兩邊面, 出左兩個心心, 大叫「好美味呀~~~」跟住就飛左上天。
依完兩粒麻糬, 我地就去左食阿婆冰! o黎台灣點可以唔食這個台灣之寶?
入到舖頭, 先發現好多生果冰都冇>_<
後尾我地叫左紅豆牛奶冰。賣相係咪好靚呢? 估唔到, 超大碗! 我地兩個人都食唔晒~
個冰甜甜地, 幾好味!
總括o黎講, 旗津漁港是一個很值得去的地方~
果度俾我感覺好悠閒, 踩著單車旅遊的話, 絕對是一個很好的體驗。
回程了, 我們又排隊上船
佢地真係上到車都keep住姿勢不變架:)
船上遇上日落, 好美
回到鼓山渡輪站之後, 我地飛快去交還單車, 然後就飛快坐捷運返酒店拎行李。
拎完行李時間好炆水...要趕尾班車去六龜, 叫酒店幫我地call左站的士去高雄火車站。
去到高雄火車站, 不停問人高雄客運站係邊, 幾經辛苦先搵到個站...
但係, 惡夢開始了!
去到突然有個男人走o黎問我地係咪去寶來, 佢話去寶來的公車已經沒有了。「冇??」明明check左6點1仲有一班車, 點會冇呀...? 我唔信佢, 我覺得佢係想呃我搭的士所以先咁講, 所以親身走去問客運站d職員。點知客運站o既職員答案一樣...都係話已經冇晒車! 咁點算呀......今晚住o既酒店係全個旅程最貴o既一間, 要NT3899+10%架......後尾聽個的士佬講, 同佢講價, 由開價NT3000殺價到NT1800, 其實都好貴...但係都冇辦法。
坐左差不多兩個鐘, 個司機兜錯路, 上到去已經8點了...明明係佢自己兜錯路, 跟住佢竟然話太遠了, 要收NT2000, 有冇搞錯呀!?!? 大拿拿50蚊架~但係最後費事煩都俾左佢就算。
當我地去到期待已久o既「園蘭花園溫泉會館」, 又係另一個惡夢o既開始......
原來園蘭花園冇幫我地留到房, 佢話send過e-mail俾我地, 又打左幾次電話我都飛去留言, 所以就將間房俾左其他人。有冇搞錯呀?? 間房我俾左錢架...你收左我錢但係你讓間房俾其他客??? 當時我真係嬲到頂點呀!! 去旅行又點會check到e-mail? 去旅行你又點suppose我會聽電話? 都唔 make sense o既...但係真係冇辦法, 所有房都已經 full 晒了...
咁我俾NT2000上o黎做咩呀? 都住唔到我想住o既房間......
其實我真係好想喊...真架...果一刻只係覺得好無助。後來佢地話可以安排我地入住佢地集團o既另一間溫泉旅館, 房間比佢地差dd啦, 佢話會退返個房價差額俾我地。但係我地特登上o黎係浸溫泉bor! 你俾間房我地有鬼用咩>_< 咩意義都冇晒...佢話果間房一樣是溫泉水, 果度都有溫泉遊樂區, 但要預備泳衣, 泳帽, 算啦~~我唔想理d咩咩溫泉, 你俾間房我安頓左我先啦。職員仲話如果聽日有客人提早退房, 就可以朝早俾我地免費享用返房間o既泡湯服務, 但佢唔包一定有, 我都冇咩期望......客房準備了, 但因為另一間旅館在村口, 要駕車落去的, 所以佢首先帶我地食左晚飯先。這就是原本包埋的晚餐, 好豐富啊......但係因為我心情仍然被頭先o既事影響, 一d都唔見得興奮......
首先上前菜
估唔到有湯, 仲咁大煲tim!!! 個湯好正, A先生一於好少理, 我食先哪~~
跟住上主菜, 唔記得左係咩...好似係雞肉, 但係酸酸甜甜, 好好味的
最正其實係食野o既環境 (對不起我拍得不好)
每一台都是獨立的, 有自己的私人空間, 夜晚花園內非常寧靜, 份外浪漫
食完晚飯, 職員載我地落去村口的旅館。坦白講, 依度真係差到冇人有!!!!
非常殘舊, 張床又唔舒服, 裝潢只係長洲渡假屋o既質素。丫, 唔係, 長洲渡假屋都可能靚過佢。這裡只可以叫做賓館, 唔可以叫做酒店。依間房價值NT2500, 我覺得一D都唔值>_< 城市之星一樣價錢但係質素好佢十倍!!!
雖然佢話自來水是溫泉水, 但係我地都唔敢係度浸...
旅館的姐姐對於我地o既遭遇感到抱歉,
送上寶來鄉六龜的特產蓮霧果一箱, 以表歉意。
一箱蓮霧果, 絕對不能彌補我心靈上的創傷的......
下一篇
+63 38 502 9155
