青島之旅 Day2.7 啤酒博物館

Day2.7 (2011-4-9)


行程: 酒店早餐-->信號山公園-->基督教堂-->迎賓館-->奧帆中心心海廣場-->
葡萄酒街-->啤酒博物館-->電視塔-->婚紗街-->登州路-->酒店

差不多3:00pm, 終於俾我地見到啤酒博物館, 好緊張呀,
到底...係咪真係如果位司機所講「裝修緊」呢?

係就係裝修緊, 不過...好似係對面依間餐廳裝修緊多d喎
唔理喇, 過去對面睇下先算!

未入到去, 發現整條街都充滿住「啤酒」o既特色!

坑渠蓋啦

垃圾桶啦

o黎左青島幾日, 已經發現周圍都佈滿「Slogan」
所以我地決定最後一定要開一篇專題研究青島o既Slogan, 哈哈
至於啤酒博物館o既Slogan係:「給我一小時 還您一百年」
咁咪有如坐時光機? 勁呀!

入場費盛惠50蚊人仔, 如果需要講解員就再加幾十蚊

票價包含2杯啤酒(1杯原漿+1杯純生), 1包啤酒豆, 有得食﹑有得睇

博物館坐落在1903年建設的登州路56號青島啤酒廠內,
至今已有百年歷史, 是國家4A級的景點。

巨型啤酒樽+杯

博物館分A & B 兩個館

A館主要講青島啤酒o既歷史: 點樣由德國佔領, 到被日本侵華搶去管理權, 最後再移交返俾中國人管理。睇完依個館, 你會明白左好多關於青島啤酒及中國歷史。

B館主要講啤酒製作過程的演化: 由原何挑選啤酒花, 到如何發酵...最後入樽包裝等等, 非常詳細! 甚至乎點樣品嚐啤酒, 啤酒的種類等等都會知道, 睇完之後, 又係獲益良多!

首先我地睇A館, 了解左好多關於青島啤酒o既歷史, 仲睇左好多珍貴o既文物

1903年建成的青島啤酒廠原名為「日爾曼啤酒公司青島股份公司」, 是德國佔領青島的憑證；直到1914年日本人佔領青島, 將啤酒廠購下, 同時更名為「大日本麥酒株式會社青島工場」。1945年抗日戰爭勝利後, 啤酒廠終於由當時國民政府接管, 正式命名為人所共知的「青島啤酒公司」。

短短100年間, 從年產

2,000噸跳升到百周年2003年時的370萬噸, 成為中國啤酒市場之首, 可算殊不簡單。

以前o既啤酒廣告, 當時仲未有簡體字架

青島啤酒廠工人證

以前o既啤酒叫做「波打酒」, 同埋以前好興儲"樽蓋"送禮物架:D

睇到後段, 進入近代史, 依篇漫畫講緊青島啤酒o既員工如何忠心, 就算病榻在床, 都憂心公司野! 老細最想就係請到d咁o既員工喇~

日本電視廣告, 關羽﹑劉備﹑張飛都飲青島啤! XD

啤酒釀造工藝流程, 嘩...複雜到丫...


跟住落o黎, 我地進入B館, 睇下啤酒o既生產過程

超過100年歷史o既機器

製作啤酒的原材料, 可以模, 可以聞

發酵池

入啤酒桶再發酵

世界啤酒博覽, 好壯觀o既櫃!!
好多人都係度拍照留念

青島啤酒的種類

啤酒品嚐, 乜飲啤酒都分成「看﹑搖﹑聞﹑嚐」四個步驟?
唔講我以為係教人品嚐紅酒

原來...啤酒係女人發明架, 仲要係修女

睇完一輪, 終於o黎到重頭戲, 我期待已久o既「原漿啤酒」!
青島人經常都自豪咁話:「青島的青島啤其他地方飲不到！」其中一個原因係依度o既青島啤以嶗山礦泉水釀成, 而當中未經過濾、色濁但香甜馥郁的「原漿啤酒」更只可以在博物館內和周邊的酒館找到! 只因佢o既品質只可維持8小時左右, 過後就會變壞。咁珍貴...所以更加要試試!

原漿啤酒不僅在口感上更加純正、爽口、富有鮮酒花的香氣, 並且最大限度地保留了啤酒中的營養成分, 富含蛋白質、活性酵母、維生素和礦物質。
飲後感: 我地都唔係太好啤酒, 不過我地飲過之後, 都一致認為原漿啤酒好好飲!!
佢不但冇左普通啤酒o既苦澀味, 而且特別香甜, 從來未諗過啤酒可以咁~

配合埋贈送o既「啤酒豆」, 簡直天衣無縫!
依個啤酒豆又香又脆, 淡淡的咸香令人會食上癮~

飲完啤酒, 輪到睇青島啤酒的「包裝史」

沒有發泡膠的年代...就係咁包裝架喇, 好似仲環保喎

醉酒小屋, 入到去你會感受到「醉酒」o既感覺, 真係會眼花花頭暈暈, 好好玩!
超神奇的體驗, 萬勿錯過!

參觀完, 就想買野~! 醉酒小屋隔離有間賣紀念品o既舖頭, 有食物&用品。
有興趣可以揀返少少做手信! 不過如果想買野食, 我唔建議依度買! 因為款式得好少...我地就係心急, 掃左好多, 有d後悔呢~~

啤酒酒心朱古力, 唔知係咩味呢?

包裝好精緻, 買o黎做手信都唔錯

樓下仲有一間好大o既手信店, 依度唔單止有我們喜愛的「啤酒豆」賣!
仲有好多乾濕海鮮食物, 款式眾多, 仲好似好好味咁~^^

大大包, 都係廿幾蚊人仔, 真係唔貴喎!

因為之前已經掃得太多, 盤川冇乜, 所以係依度只係買左啤酒豆。

一盒有20小包, 全部真空包裝, 做手信唔錯呀~

出到去, 仲有間賣嶗山綠荼, 買完我地滿載而歸, 要走lu~

總括o黎講, 青島啤酒博物館都係幾值得行o既~慢慢睇都睇左2粒鐘!
話晒都係代表住青島o既歷史重要產物之一, 有時間不妨行下啦~


青島啤酒博物館
票價：50元 (包兩杯新鮮青島啤酒, 一包啤酒豆)


開放時間：8:30am - 5:30pm (4:30pm 停止售票)

※ 地址：登州路56號
※ 交通：的士；或市內公交車乘坐11、15、25、30、104、119、205、217、219、221、225、302、307、308、367、604、路在「延安一路」站、「15中」站或「台東」站下車即到。


下一篇

青島之旅 Day2.8 中國第一鐵塔