Day2 (24 Aug 2011)
食飽飽, 我地返酒店休息, 換泳裝, 再出去玩水!
食飽飽, 我地返酒店休息, 換泳裝, 再出去玩水!
下晝出太陽, 房間又有另一種味道。
換完泳衣就出去玩水上活動, 再次嚟到 Water Sport Center~
連續兩日下晝都有水上活動時間, 今日係自由玩, 聽日係出海浮潛。
有得玩嘅都可以玩, 獨木舟﹑香蕉船﹑飛魚﹑wakeboard﹑風帆﹑浮潛﹑游水﹑曬太陽等等!
不過玩咩都好, 之前一定要塗足太陽油! 因為馬爾代夫嘅陽光好熱情, 坐10分鐘皮膚已經燙熱, 坐1個鐘包你變燒豬。
馬爾代夫嘅汪洋, 我嚟喇~~~
坦白講, 依度嘅水唔算清, 仲有少少濁!
就咁潛落海係咩都睇唔到架@@
我地玩左香蕪船, 超鐘意依張相!! 無論係構圖定色彩, 都好完美!
因為太靚嘅關係, 我決定破例唔放哈哈笑, hahaha
跌落馬爾代夫個海洋中, 感覺真係好正, 好難忘
如果A先生係度就好喇~
因為快艇得一部, 所以之後我地輪流玩wakeboard & 飛魚。
我就去左玩其他野, 試過撐獨木舟, 帶埋浮潛用具出去睇下有冇靚Reef可以snorkling, 結果係冇嘅~
同埋海面比較大浪, 驚落左水上唔返船, 所以只係撐左一陣就回岸了。
聽佢地講飛魚超好玩! 不過因為時間太少, 我最後都玩唔到, 希望聽日仲有機會啦。
玩左兩個零鐘, 大家已經好累了, 大會為我地安排左另一個活動: 出海釣魚。
印象中好似未試過釣魚, 第一次, 就獻左俾馬爾代夫
黃昏時候上船, 可以看到醉人的日落......
馬爾代夫獨有嘅多尼船, 船頭彎彎尖尖, 好得意架
原來船頂甲板上放左好多張day bed, 俾我地一齊上去呷啤酒, 吹水, 吹吹風, 嘩, 真爽!
此情此景, 真係畢生難忘......其實香港嘅遊艇都可以效發下, 瞓day bed真係好舒服~
當船開到咁上下, 我地落返去準備釣魚用具, 如果釣到魚, 船上嘅廚師會即場炮製刺身壽司
聽聞馬爾代夫釣魚好容易, 每隔幾分鐘就釣到一條, 易過食生菜。
但係我釣左成粒鐘, 一條魚都冇...
我隔離果個H小姐就釣完一條又一條, 足足釣左3條大魚@@ 勁!!!!
亦都有團友釣到條東星斑, 仲有條好多牙嘅惡魚, 我都爭住同佢影返張合照~
最後嘅魚獲, 非常豐富! 今晚有口福了, 嘿嘿~
釣唔到魚, 食飽之後就上去甲板睇星星, 睇星星吸引過釣魚。仲記得尋晚...剛到達Amari嘅時候, 舉頭就係漫天星星! 我記得人生冇乜幾可見到咁多星星, 有次係在澳洲墨爾本的山上, 有次係在泰國的華欣, 但最多最清的, 應該係今次了。躺在我最愛的day bed上, 望著這疑幻似真的星夜, 真係好浪漫, 好唔真實。我好想用鏡頭記下依一幕, 但係似乎係妄想! 因為部船不停郁, 我就算有腳架都曝光唔到啦~還是用眼睛快門拍下吧!
相機極限只係影到依幾粒, 運用一下想像力啦, 將佢乘1000就差唔多喇!
咁清嘅天空, 一定可以望到好多流星, 我就落足眼力, 果然不出所料, 隔幾分鐘又一粒, 有d仲好光條尾好長添! 當我見到第一粒, 其他人以為我吹水, 後來佢地都見到, 仲唔止一粒添~
每次當我見到流星, 我就會想起一首舊歌<<感覺瞬間>>
歌詞是這樣的: 「傳說人世有許多轉站 轉錯便難折還 就像望流星勿掩上眼 我倆總奢望這一眼」
B小姐非常非常鐘意依首歌, 係陳曉東唱嘅, 因為佢唔紅, 首歌又唔係派台歌, 所以冇咩人識
某年嘅獅子座流星雨, B小姐曾經同一位心儀嘅男仔一齊聽住同一句歌詞, 睇到同一粒流星
或者係依d青春豆芽夢, 令到B小姐對依首歌有個情意結, 每次睇流星都想聽住依首歌啦~
已經過去左, 我對果位男仔都已經冇感覺架喇, 希望A先生唔好嬲呀~
仲有另一首, 係許美靜嘅<<星閃閃>>, 同埋安仔嘅<<星河感覺>>都好應景架~
望住d星星, 就好似充滿希望咁, 所以B小姐自細就好鍾意睇星星, 願望係有一間屋, 房入面有個天窗可以晚晚都望住星星瞓覺~
如果依一刻A先生係度就好lu...
真係好希望有一日, 我可以帶A先生再嚟一次, 一齊瞓係水上屋個露台上數星星數天光!
I WILL BE BACK, 等我!
船泊岸了, 好唔捨得......
唔知聽晚仲睇唔睇到咁多星星呢?
飲品免費, 我在drink list中點左杯Blue Maldives
晚飯過後, 轉移陣地有DJ pool side party,
有DJ打碟, 有雞尾酒, 此活動嘅目的係希望我地聯誼下, 我地明白。
Amari嘅職員好熱情咁招待我地, 仲邀請我地一齊跳舞。
不過有好多團友已經太累返左房休息, 播d歌又比較土, 現場冇咩氣氛, 完全投入唔到呢~
加上又夜...活動左成日, 大家都已經好攰了...
所以坐左陣我地都返房休息了。
沒有留言:
張貼留言