Jumeirah Vittaveli [房間篇]

Jumeirah Vittaveli

去完JD, 再去JV, 我地感覺這邊比較熱鬧, 容易見到其他住客。房間方面一共有4種:

Beach Villas 184 sq. metres
Beach Suites 302 sq. metres
Lagoon Villas 200 sq. metre
Lagoon Suites 256 sq. metres

簡單來說就是沙灘屋, 豪華沙灘屋, 水上屋, 豪華水上屋。豪華果隻係複式單位, 兩間房, 適合family。普通果隻就只有一張雙人大床, 適合情侶、夫婦。

好開心我地被安排住水上屋^^
雖然沙灘屋都好靚好舒服, 不過來馬爾代夫, 總有情意結住水上屋才像樣!

起初對水上屋沒太大期望, 因為Marketing常常focus在沙灘屋上, 泳池有多大, 環境有多靚等等! 所以一直都有錯覺Jumeirah Vittaveli比較適合Family。但係親身住過之後...我地一致改觀, 認為JV的水上屋其實都好o岩情侶架, honeymoon其實都ok架!

設計方面, 採用少少中東風情, 啡色mix橙色+淡黃色, 令人感覺好warm好舒服! 客廳睡房分明, 而且無論是浴室、客廳、定係睡床位, 都有玻璃門連接出面的露台, 個人係非常喜歡這種設計的!! 上次去Halaveli一樣都係咁設計, 無論在房間邊度都有門出去露台, 係好開心o既事o黎架!!

如果鍾意開揚d, 拉開晒所有窗簾, 無敵馬爾代夫海景就在你面前, 可以一邊涼冷氣, 一邊望住個靚景, 嘆返杯咖啡! 再唔係, 浸個花瓣浴, 邊聆聽著柔和的海浪聲, 出來摸下酒杯底, 同honey細數點點繁星, 淨係幻想下都好浪漫~

泳池夠大, 真係可以游到水的, 而不是浸下水的plunge pool; 浴缸又係超大, 一家4口一齊浸都得! 超愛佢個浴缸呀!!! 另外, 客廳張梳化好好hea, 茶几下面仲係透明玻璃底, 可以睇到海底的! 露台設備非常齊全, 除左兩張沙灘椅唔少得, 仲有一張超大day bed俾你攤抖, 請人返o黎幫你按摩又得, 正到暈!

雖然我住過o既馬爾代夫唔多, 不過無論住邊間馬爾代夫o既resort, 心情都係超級興奮, 最可惜是身邊不是A先生!

每次出差當我見到靚景靚酒店, 心裡都很希望下次可以同A先生再來!

哈...唔知下次係幾時呢? 下次下次, 希望不會等得太耐!

好喇, 講返上水屋先, 有Lagoon Villas同Lagoon Suites兩種, 到底有咩分別呢? 其實好簡單, Lagoon Villas就係o岩兩個人住, 而Lagoon Suites, 就係複式單位, 有一張大床+兩張細床, o岩大家庭住的。沙灘屋都係一樣啦, 情侶住Beach Villas就夠架喇。

今次因為逗留時間夠耐, 所以除左Lagoon Villa, 仲一次過參觀埋其他3隻房! 因太太太多相了, 執都執死人, 所以唔放晒出來了, 簡介少少啦~~

Beach Villas, 個泳池係L型的, 實景比想像中細, 但係都好夠游了。由房間可以直接通往沙灘, 真係非常方便! 真心的, 一家大細來玩返幾日, 一定好Happy! 如果Afford得起的, 依間酒店同埋房真係唔錯! 原因好簡單, 酒店配套完善, 餐廳多, Kids Club勁大又多野玩, 酒店仲有24小時醫生長駐, 萬一有咩頭暈身慶, 都唔洗咁驚!

如果係大家庭o既, 揀Suites就冇錯了! 我地離開果日因為要check-out俾其他住客入住, 酒店安排左間Beach Suites俾我地hea到夜晚, 環境好好架, 一來泳池大少少, 二來樓上仲有個天台, 俾你地開BBQ party都得!

最後就係Lagoon Suite喇, 佢就巴閉喇, 座落於大海中心, 出出入入都要由快艇接送, 全酒店只有幾間, 好珍貴。我地住Lagoon Villa果幾日, 日日望住依幾間Lagoon Suites, 襯埋個咸蛋黃都幾好feel~ 你話, 如果一班friend一齊住會幾開心呢~

總括o黎講, Jumeirah Vittaveli令我地一眾都好滿意, 只係有少少熱鬧, 特別喜歡私隱度的朋友就要留意。不過咁, 見到人都係離開左間房坐buggy出去o既時候見到o者, 如果兩口子lei埋在房裡面, 其實都係好寧靜, 好舒服o既~