Park Plaza張床超舒服～～～
尋晚沖完涼不知不覺就訓著左，一訓就係第二朝！從來未試過咁好訓架
因為我地個package係唔包早餐的，所以起身第一站就係去覓食^^
本來想去旅遊書中介紹的 Le Vendome 食法國菜o既，但因為司機蕩失路（都唔知佢真唔知定假唔知），明明5分鐘去到o既地方．．．竟然遲左半個鐘先去到
同埋呢，本書個地圖假架．．．
大家千祈唔好信晒新ｘ期果本曼谷旅遊書，佢個地圖亂o黎的！@@
(希望日後會改善啦)
幾經辛苦終於去到．．．但係發現「無開門」！T^T
真係可惜，點解我會睇漏一句「星期日不設午市」呢？？？
塞翁失馬，我地沿著車路行返過隔離街，諗住求其搵一間食就算
點知俾我地發現另一間好野！
係旅遊書有介紹的Chapter 31
太肚餓了，唔理三七廿一就走左入去
間餐廳環境好好，入面全部都係外國人
可能未到食飯時間，餐廳冇咩人，好寧靜o既環境
lunch set都唔貴，平均都係二百幾THB，仲平過法國野
我地每人揀左一個set，估唔到咁豐富！有餐飲，主菜，仲有甜品！
雖然個主菜份量細ｄ，但係加埋個甜品就o岩o岩好～
小Ａ叫左泰式奶茶，佢比港式奶茶甜，同埋較橙色，
唔知加左ｄ咩入去，味道怪怪的！
餐飲佢俾我免費轉西瓜汁，依杯西瓜汁係４日以來最好飲的！
西瓜汁超甜，佢將ｄ冰搞碎做刨冰，飲落去就好似飲緊西瓜思樂冰一樣，超好飲！
我叫左蒜蓉大蝦意粉，意粉彈牙，蝦爽甜，超好食，不過很辣
小Ａ叫左青咖哩飯，飯底是小熊形狀的，很可愛^^
咸蛋竟然入口即溶，出乎意外地好食
青咖哩都不俗，都是偏辣啦
不過．．．最重要戲都係個甜品！
佢有得俾你揀home make cake／窩夫／雪糕，我地揀左home make cake
蛋糕櫃入面有勁多款式俾你揀，睇到我流晒口水．．．
突然間，俾我地見到一款寫住「very delicious」，very delicious？「我要依個！我要依個」我立刻嚷著。
另外仲見到一款係「Number One」，ｄ形容詞真特別，小Ａ結果揀左依款
「very delicious」同「Number One」都俾我地揀晒^_^
首先試下「Number One」的朱古力蛋糕，面頭是軟滑朱古力醬，入面是鬆軟的朱古力蛋糕，朱古力味非常濃郁，好味道！
然後到「very delicious」，結實質感的朱古力蛋糕，上面鋪滿可可粉，有塊白朱古力。食o既時候，將熱騰騰的吉士醬淋上面，吉士醬的熱力令到白朱古力溶化，砌一舊蛋糕，一冷一熱的口感提升蛋糕的味道，兩者配合得天衣無逢，我從來都未食過咁好食的蛋糕，我信佢係「very delicious」了！
今餐幸福指數爆燈o既 Lunch 食到咁飽，兩個人都只係百幾蚊港幣，真係抵到爛！
這是旅遊書中的地圖，請看１２＆１３
兩個位置都錯的，不過只要沿著Sukhumvit 31行，留意右手面，就會見到Chapter 31
以下是Chapter 31出門口各右望的景色
如果大家想去Le Vendome食法國野，請認住依個街口
跟住粉紅色的士轉左，向前行，再在第一個街口轉右，行前少少就會見到(右手面)
食飽之後我地就向翟道翟出發！
當ＢＴＳ快要到 Mo Chit 站的時候．．．我地見到一個好壯觀o既畫面！
成千上萬個帳篷屋頂聯群結黨，翟道翟比我們想像中還要大！
到了Mo Chit站，已看到一條人龍
熱的陽光都掩蓋不了我們興奮的心情！
行入翟遁翟的小路，已經見到不少有趣的檔子
可連發的橡筋槍，１００Ｂ 兩支
翟道翟很大，分了廿幾個SECTION，就算有地圖，都很容易迷失方向
皆因個個路口都好像差不多．．．我們唯有碰運氣周圍逛。
用草繩織成的手工藝品，栩栩如生
精緻特色的燈，三四十蚊港幣就有交易
這個區域專賣與寵物有關的東西，連寵物都有得賣呢～
人手彩繪布鞋，獨一無二
藝術專區，很多藝術家窩藏在這裡
街頭小食，包羅萬有
變性人街頭表演，旁邊有她的「變前照」，其實原本都幾靚仔丫
胡慧沖介紹：泰國最香香薰油「Ｋａｒｍａｋａｍｅｔ」
咦？唔解唔係ｏ既？
．．．．．．．．．．．．．．．．．．．．．．．．．（沉默左３秒）
原來我去錯左呀＞＜ 等我仲鬼死咁興奮，仲買左唔少tim．．．
我見都係section 3-124就入左去，唔知道後面仲有
翟道翟特脆多士，新鮮烘烤，非常好食！
好食到震，後悔冇買多包
這名小子，拉茶功夫十分到家，拉得像跳芭蕾舞，還很陶醉．．．
拉茶影片
泰國的停車場，大得很壯觀呢．．．
行完翟道翟，我地搭BTS去Saladaeng站晚餐～諗住去書中介紹的「建興酒家」
憑著之前搭的士o既經驗，加上書中提及有冒牌貨，所以我地都好小心！
司機好似唔係好識路，試過打電話問人，問完之後車左我地去一個地方，堅持話地址係依度，就放低左我地。但係我地睇地圖明明唔係．．．幣在我地唔識同佢溝通，結果都選擇落車。
後來我地跟住地圖搵，但係都搵唔到！最衰個地圖ｄ標示鬼咁唔清楚
響果條街來來回回咁行左不下3~4次，中途不停問人，問極都搵唔到．．．
後尾遇到一間識英文o既職員，好心咁教我地，仲畫左個地圖。
我地先發現，原來個地圖係錯的！！！！！！！！！！
真係一肚氣！足足浪費左我地一個鐘！
之前去台灣已經係咁，而家去泰國又係
我強烈建議大家千祈唔好用「新x期」本旅遊書，入面好多資料都係錯的！
原來建興在Plaza Hotel對面，我唔明點解地圖可以錯得咁離譜！
終於來到建興酒家，但都已經嬲到冇晒食慾！
點左招牌咖哩炒蟹，碳爐冬蔭功，仲有一條煎魚。
我地好趕時間，因為夜晚Book左做按摩，條煎魚勁耐都未o黎，又貴，早知就唔叫！
好好食咩？唔係好覺。
咖哩炒蟹唔夠熱，又少肉，冬蔭功係九龍城貨色，條煎魚，揭開層皮，乜味都冇！
唔好意思，心情真係會影響對食物的評價的
我地Book左果間叫LEYANA SPA，佢地寫最後BOOKING係8點
我地要坐佢o既接駁車，就要7點半去到phrom phong站
問題係．．．我地7點半，還在建興酒家埋緊單
８點前要去到，如果自己搭的士應該趕到的
不過ｄ司機咁鍾意兜路，我諗１個鐘都未必去到
於是我就打電話去改時間，打了一次．．．兩次．．．好多次都唔通
後尾小Ａ想去洗手間，我地去對面的Plaza Hotel再打過，結果俾我打通左
我用我小學生程度的英文同佢溝通，一心急講得仲差
後尾佢話肯等埋我地^^ 非常之感動呀．．．
去到phrom phong站，有個男人對我地揮手，係載我地去o既司機
奇怪哪．．．佢點知我地就係呢？
「離遠見兩個傻仔跑得咁急，都唔難估o者ＸＤ」小Ａ說
原來SPA店專車，係一輛私家車來的
個司機豈不是等左我地一個鐘＠＠？
再一次感到唔好意思．．．
來到了LEYANA，係一個好寧靜的環境，一望已經覺得好舒服
本來我想影幾張靚相俾大家睇，但係小Ａ話：「仲影？嫌人地等得我地唔夠咩～」
為左唔想阻住人地收工．．．我都乖乖收埋部相機
去到只係得我地兩個，彷彿成為了貴賓。
Reception姐姐又靚又好人，我好後悔唔記得俾小費佢。
兩杯Welcome drinks，一杯是熱茶，一杯是酸酸甜甜的東西，唔知係乜，但係幾好飲
我們兩人都選擇左做Warm Oil Message，有Thai Association半價優惠，兩個人做了100mins，都只係九百幾銖乍．．．圍起港紙都係二百幾蚊，真係抵到爛！
總括o黎講，LEYANA SPA俾我地o既感覺係「環境舒服，感覺relax，技師力度夠，服務好」，就算冇半價優惠，都值得推薦。
http://www.leyanaspa.com/html/massage_2.html
本來小Ａ見打咁多次都打唔通就算，去第二間做架。但係我鍾意依間，因為有人讚過佢手勢好，環境靚，唔想冒險試其他。好在我堅持打多個電話去，先有咁完整的一日。
今日真係覺得好滿足，一頓豐富的Brunch，一個平靚正的翟道翟，一頓普通好味o既晚餐，一個舒服的按摩旅程，
最後．．．一個助人放鬆的香薰，帶我進入美夢。
我好掛住泰國呀, 好想再去
回覆刪除你blog首頁張相好靚呀!
[版主回覆03/19/2009 13:14:00]多謝讚賞, 我覺得你個Blog張意大利藍色小屋o既相都好有feel~~ 我都好掛住泰國...泰國真係一個好好玩o既地方, 消費又平~ heehee, 我同你都住過Aleenta架, 不過你住果間係布吉, 我住果間係華欣^^ Aleenta真係好perfect, 不過華欣個海灘麻麻地靚, 唔知布吉果個海灘d水清唔清呢?
係, 你都住過aleetna? 我地超鍾意aleenta! 布吉那個沙灘啲水都唔太清, 不過唔係污糟, 只係混濁. 華欣間aleenta係點架? 你都係去度密月嗎?
回覆刪除[版主回覆03/20/2009 22:18:00]heehee, 我唔係去渡蜜月呀, 只係想同男朋友二人世界下 不過我都非常同意 Aleenta 渡蜜月是一流的! 華欣果間Aleenta同布吉果間格局幾似, 我係住Pool Suit, 獨立一間, 一推開門就係沙灘, 有吊床仲有個按摩浴池, 好正架... 不過食物方面好似冇布吉咁豐富, 你地有cookies, 仲pack得咁靚, 我地得生果乍 華欣果間好偏僻, 唔近市區的 咁布吉果間位置偏遠嗎? 你地有冇出島玩?