平價旅館 5footway.inn.project Sultan

Day1.2 (13 July 2012)  
5footway.inn.project Sultan

酒店方面, 由Majestic ($1700/晚) --> Santa Grand Hotel Lai Chun Yuen ($1100/晚) --> 5footway.inn.project Sultan ($700/晚), 真係好大改變。新加坡d酒店真係好貴好貴, 只係兩年, 物價標升咁多, 如果冇一千蚊以上, 都好難搵到正常o既酒店。

依間5footway.inn.project Sultan係新開o既青年旅館, 由舊店屋改建而成。因為係平價旅館, 酒店除左大堂之外, 房間內都冇乜裝修可言, 亦冇room service, 純粹租個床位俾你。入到間房, 得4面牆, 訂的時候網上睇o既只係設計圖, 仲用左廣角鏡, 實際上間房的陳設唔係想像中咁新淨。可能因為事前有期望, 所以果刻難免有少少失望啦。

AABB的實景拍攝

未住之前勁興奮, 仲寫左篇星洲酒店【跳槽到 5footway.inn】, 臨出發前有少少後悔唔住好d, 如果有得俾我再揀, 我寧願俾多少少錢住好d。因為每個地方一生人都唔係有機會去好多次, 好似新加坡咁, 2010年去過, 今年去完, 短期內都應該唔會去第3次, 咁點解唔俾多少少錢住好d呢?

除左間房細d, 同埋冇咩配套之外, 其實依間旅館都有好多值得欣賞o既地方o既~
例如...reception職員好nice啦~

旅館內到處都充滿藝術氣息

5footway.inn.project Sultan 唔係唔好, 只不過真係太宿舍feel, 年青人三五知己咪o岩囉, 但雙人房o既價錢, 加多少少可以有更好o既選擇。不過住慣左又ok, 只要調節心態去住宿舍, 咁就冇問題喇!

瞓上床望到嘅景觀, 張床其實比想像中舒服, 同埋估唔到都幾大張喎!

旅館走廊

Pantry

仲有Apple機供住客使用, 高速wifi服務, Nescafe咖啡機, 微波爐, 電櫃
這些設施都幾值得人欣賞嘅~

入住小貼士: 

1) 如果係唔吹頭瞓唔著o既話, 記得到步即刻問下有冇風筒借, 因為貨源好少, 俾人借左就唔知幾時再有, B小姐3日都係濕住個頭瞓的。又或者自己帶備一個旅行風筒去。

2) 旅館沒有毛巾﹑拖鞋﹑牙膏﹑牙刷供應的, 依d咁私人o既物品, 記住執齊d喇。

3) 房間只有1個小插蘇, 建議帶個拖板去, 可以一次過叉晒所有電子用品o既電。B小姐而家每次旅行都有帶拖板的。當遇上需要用轉插器的國家, 你就會feel到有幾方便了!

 

雖然位置方面呢......就唔算超近地鐵站, 不過勝在位置夠中央。

最近係 黃色 Circle Line 新站 Nicoll Highway, 行過去大概5min左右啦。

另外行去Lavender站 / Bugis站都係10min左右, 都唔係好遠。

搭去Dhoby Ghaut站轉車都好方便。

Nicoll Highway 地鐵站A出口後沿著天橋直行, 去到尾見到Java Rd就落去

然後過馬路去對面, 直行到街口轉右, 再直行少少就見到喇~

下一篇　炭爐叻沙 結霜橋