阿蘇瑞士雞翼

B小姐平時都幾鍾意下煮, 因為超為食!
鍾意煮又鍾意食, 所以三色台的飲食節目: May姐有請 ﹑ 為食總師令 ﹑ 蘇good ﹑ 食得峰so等等, 我都唔會錯過! 最近阿蘇又做返, 成為我每個禮拜必睇的電視節目之一。前幾集教整瑞士雞翼, 係A先生最愛, 多年前跟餐廳大廚學過調瑞士汁, 用o黎撈丁一流! 雖然個食譜唔見左...但隱約仲記得係用 生抽 ﹑ 老抽 ﹑ 冰糖 o黎做個汁。

今次阿蘇教o既方法唔同, 係落醬油加雞湯, 仲要指定用邊隻醬油, 好似好勁咁, 所以令我好奇之下...買齊料擇日試試。跟住佢個方法整, 真係非常成功, 所以同大家分享成果^^

 

((2人份量))
材料:
1) 雞翼8-10隻 (可選雞中翼或雞全翼, 傳統是用雞全翼, 賣相較靚, 但B小姐喜歡雞中翼^^)
2) 蔥少許, 薑一兩片 
3) 冰水備用
4) 鉅利高級醬油 半支 (店舖在灣仔鵝頸橋附近)
5) 雞湯 250ML
6) 冰糖大量
7) 紹酒少少

 

步驟:
1) 先將雞翼處理 (去毛)

2) 把已處理的雞翼放進
蔥﹑薑 滾水焯一焯, 立即放進冰水冷卻備用
註: 此步驟十分重要, 冷卻後的雞翼會收縮, 皮脆肉嫩彈牙, 煮完之後雞翼仍脹卜卜

 

3) 1:1份量鉅利高級醬油及雞湯, 加入大量冰糖及紹酒少許, 以中火煲 (冰糖份量因應個人喜好調較), 試味! B小姐唔記得左2人份量, 跟足落晒成樽醬油@@ (500ml)+半盒雞湯(500ml), 其實得10隻雞翼應該唔洗落咁多, 落少1半應該都得(即各250ml), 冰糖方面...我都落左半罌。

 


4) 瑞士汁煮滾後把雞翼放入去(記得雞皮向下), 至再次煮滾後熄火上蓋浸10分鐘

 

 

5) 10分鐘後, 開蓋把雞翼逐隻反轉(雞皮向面), 然後再浸多10分鐘, 即成!

上碟後色澤均勻, 隻隻都脹卜卜A先生試過之後都大讚好味, 估唔到淨用浸的方法都可以令隻雞翼熟, 而且肉質仲好嫩tim!
煮完用淨好多汁, 打算聽日用o黎撈出前一丁同埋再滷多10隻雞翼, heehee