尋幽探秘在中環

今日陪A先生去中環剪髮, 因為我地對中環o既路都唔熟悉, 順便o黎個尋幽探秘旅程。

出發前, 已經背晒地圖。話你知, B小姐有「人肉地圖王」之稱, 對於地圖, 望下就會入腦。而且任何地方, 去一次就記得, 去兩次就已經好熟。

首先第一站係去剪頭髮先, 上網搵左好多, 聽人介紹中環Oscar剪得幾好, 好多人都大讚, 所以我地就試一試! 去到睇個裝潢同價目表, 好似好貴咁喎......死啦, 之前冇問定幾多錢tim! 死就死, 剪完先算! Oscar係一個後生仔, 講野好有禮貌又斯文, 佢剪得好細心, 當A先生個頭係藝術品一樣。剪左一個鐘左右, 就剪完了。剪得好好睇喎~~更surprise o既係, 佢只係收$108乍! 超抵~~

剪完頭髮, 我地就去tea一tea。我地去左士丹利街的檀島咖啡, 叫左蛋撻, 一個tea set, 加多一杯奶茶。A先生係奶茶怪,

佢對奶茶o既要求好高! 每次去食野, 佢就會品評d奶茶沖得好唔好。而我, 都鍾意飲奶茶,

但我條舌頭就冇佢咁勁了。我覺得大快活o既奶茶已經好好飲。依度o既奶茶好好飲, 有茶味又有奶味, 口感好濃, 入口好厚好滑,

大快活果d根本比唔上, 同埋佢落一包糖已經好夠味。我係糖怪, 從來飲熱飲都會落超過兩包糖, 但係依度竟然唔洗~~蛋撻酥皮o黎講幾好~~不過因為我同A先生都係鍾意曲奇皮多d, 所以冇話特品鍾意。

至於個tea set, 叫左雞扒撈一丁。d蔥油好正, 令到d丁麵好香。我覺得好好味, 唔覺唔覺就食晒! 雖然好多人都讚蘭香園, 我地都食過, 但我覺得依度好似好味d喎~~

食飽飽, 我地就開始我地o既探險旅程。

一定唔少得行石板街啦, 這裡是遊客區, 有好多得意野賣。
估唔到連夏威夷o既草裙都有, heehee。

依度有好多攝友專登o黎取景影相。

不知不覺就行到中環警署

我地向左不斷行~

行完又兜返落去, 哈, 我地已經唔知行左去邊了~~

來到了酒吧區

畫廊

依間餐廳叫「撒哈拉沙漠」, 唔通係食非洲菜?

常常覺得香港人好幸福, 只要有錢, 哪個國家的菜都可以食到。中環有好多特色餐廳, 畫廊, 酒吧等, 充滿異國文化色彩。

除左異國靚餐廳, 中環又有舊式鐵皮麵檔, 真係新舊文化交融之地。

行返落山, 我地看到一間專賣刺繡的店舖, 可以用針線繡出一幅畫, 有d老虎被繡得栩栩如生, 真係好勁!