北京凍到震之旅 Day2a (萬里長城)

Day2　(2009.12.25)
行程: 萬里長城->南鑼鼓巷->西單->鬼街

第二日，六點半起身，好似冇訓過咁。
今日上長城，為左爭取時間，所以訓少d。
因為要趕8點鐘果班火車，所以冇食早餐就出發。
本來叫酒店幫我地call的士，不過佢話因為今日太凍，
所以call唔到車，叫我地行過去。
行過去？？行幾耐呀？「15分鐘左右」
好啦，冇辦法都要架哪。

一出街，凍到呢．．．任何皮膚只要暴露在空氣中都會極速凍僵，要用頸巾包埋塊面先得。大家都包到成隻糉咁，我好佩服有d北京人點解可以著咁少衫。

原來真係好快，不經不覺，我地就行到去北京北站。

不過去到買飛的時候，佢話冇8點鐘的班次的，只有9:33am，下．．．？
我又再一次O咀，咁早知就訓晏d啦。結果我地在車站齋坐左1個半鐘。
時間就這裡被我們浪費了。都係我衰，哈哈。

兩張往八達嶺的一等座車飛，每張￥17

車站冇野食的，又被騙了，有一間超市仔，其實係士多，入面有d杯麵乾糧等售賣。我地買左兩個杯麵做早餐，這是旅程中最難食的早餐，但冇得怨，鬼叫自己衰咩！A先生有得怨，成朝不停「o我」我，話個杯麵冇送好難食，又話訓得少，我都唔想架．．．

唔係咁好食的杯麵

等待期間都發現好多野，都算係收獲丫。
北京真係好大塵，車站裡的椅子全部都鋪上一層薄薄的灰塵。

佢地唔抹？唔係喎，車站職員已經好勤力咁成日抹，出動雞毛掃及濕毛巾，但係好似冇乜作用，呢頭抹完，果頭又鋪塵，或者係靜電吸左ｄ塵都未定。

但係我地之前睇唔到就坐，賴晒野。>_<

他們正在排隊上車，從這個景象看來．．．北京人都幾自律丫

我地就係坐依班車，終站是延慶，八達嶺則是尾2的站。

車站好宏偉

這就是我們乘搭的「長城號」

9點33分，火車開動了。車箱都幾舒服，可能因為今日星期五，乘客都唔多。我們剛好同一班香港鴨仔團同車同卡，個導遊好似當埋我地係佢團友XD　去到外地，最怕就係不停聽到廣東話，令我覺得自己好似仲係香港咁。不過今次有好處，就係我途中聽到一些解說，令到我沒有錯過一睹居庸關長城及水關長城。同埋我知道原來火車在八達嶺只係停２分鐘，跟住鴨仔團，趕得切落車：Ｐ

居庸關長城

依段勁斜，點行呀？＠＠

臨落車前我們都做左蒙面人

落左車，我地就同鴨仔團分道揚鑣。縱然有太陽，室外還是凍到死，寒風刺骨。不是一般的寒冷！此地不宜久留，我們只想用最快的方法遊長城：就是坐纜車上去，坐滑車落返o黎。

咁ｏ岩有個VAN仔司機兜客，話載我地去纜車站，每位10蚊，我地唔識路，又唔想係出面凍，就上左車。不過佢唔係即刻開車，要坐滿先開，不過好快就俾佢搵到兩個日本遊客。

載到纜車站，因為大風，所以暫停開放。

噢．．．真係福無雙至，禍不單行，今日特別黑仔！

好彩司機未走，我請佢載我地去滑車站，
不過佢話滑車站距離依度好遠。(乜真係咩?)　

佢話載我地去甕城，叫我地行上北四樓，然後坐滑車落番o黎。
行上去? 行幾耐架...? 佢話大半個鐘就得哪喎。又好～

司機仲話我地走o既時候可以call佢等佢o黎接我地，
不過又係每次每人10蚊，咁短路程，佢都幾好賺喎！

佢部van仔可以坐4個人，並提供包車長城１日遊服務，
價錢百零蚊(我唔係記得好清楚)，有興趣可以打去問下價呀。
依個係佢個電話13436947752

離開纜車站範圍o既時候，我地見到駱駝呀！仲可以俾遊客坐上去影相添。
駱駝好得意，原來好大隻架，同埋佢好多毛。我真係有衝動叫司機停車俾我落去影相T^T 好後悔．．．連佢真身都趕唔切影

上長城，凍到離晒譜！越高的地方就越大風，d風好凍，會吹到人地痛的！
我地登左一兩個樓就冇繼續前進了，真係怕上左去落唔番o黎。
落去o既時候好斜，加上超大風，真係要扶實先得。

勁大級樓梯，幾乎要用手爬

一場o黎到，梗係要影番ｄ代表相

每一塊磚都被刻滿字，真係唔明點解d人咁得閒

小朋友就最有精力，跑跑跳跳都不覺得累

回頭一望，原來都幾斜

一班青春少女在留倩影，若干年後睇番，佢地會唔會唔認得邊個係自己呢？

我地都要留倩影，這些合照，買少見少，因為真係好凍

估下依個係咩？開估：係箭洞呀～
以前d士兵就係在這些洞口發射箭

其中一個城樓上

我唔係好明，以前ｄ士兵點樣行長城的？
條路咁斜，佢地又冇咁多保暖衫，在上面行都成問題，何況打仗？
八達嶺路段已經唔算陡峭，其他關口，我見到有d真係45度角的，咁高，點行呀？
真係一個謎．．．

我地o既「長征」之旅到此為止。遙望遠處那個城樓，只能望門輕嘆。
因為我地真係怕上左去落唔番o黎

之後我地沿路慢慢落番山。正所謂「上山容易落山難」，因為路斜又大風，落去的時候，要慢慢扶著行先得！好彩冇落雪乍，如果唔係實碌落去。

仲有一個鐘，我地周圍逛下，再搵地方歇下。

紀念品店常見的解放軍帽

唔得了...我就o黎頂唔順了，
即使戴左冷帽耳罩頸巾手套雪boot，我都仍然覺得好凍。
特別係手指，十指已經冇晒知覺，僵硬晒。
遠處突然見到ＫＦＣ，猶如見到沙漠中的清泉，
我們一見即狂奔入去，從來未試過咁愛ＫＦＣ的。
入到ＫＦＣ，第一時間除低手套雙手緊握暖包，但都好似冇乜起色。
跟住我去後面乾手機，用暖風取暖，過左５分鐘，終於有返d感覺，郁得番。
叫左兩個套餐，何其美味，第一次覺得ＫＦＣ咁好味，
捧著那杯熱飲，十分感動．．．

讚：內地KFC的"勁爆雞米花"是超好食的！有機會一定要試，同香港唔同架

食完ＫＦＣ，我地CALL左司機o黎接我地落去火車站。
其實ＫＦＣ行落去只係好短o既路程，但係我地真係1米都唔想行。
亦都因為咁凍o既關係．．．整個長城範圍都只係影左好少相。
連見到「好漢碑」都懶得行過去，這絕不是我。
司機熱烈推介十三陵，話一定要去，仲有幾個景點，我都聽唔清楚。
「下次吧」
「下次等夏天再來吧」
來之前我誓言甚麼地方都要去，一個也不能少！
來之後我說：「下次再去吧」言語中卻不流一點可惜之情
哈哈，都是天氣的錯！

今日真係好好好好凍！我以為北京係咁上下溫度好正常，後來才知道，我地去果日，正正係北京入冬以來最凍ｏ既一日。－１４度，更是１０年來最凍的聖誕節。我地揀左依日登長城，我覺得我地好叻呀．．．完成左一個創舉！

1hr10min之後，我們又來到這個宏偉的車站

火車的職員好似機組人員ＸＤ

返到北京，我地就轉酒店。出火車站時發生了件趣事，應該說趣事嗎？
當我們欲從原路離開車站的時候，車站嬸嬸截停我們，問：


「幹嘛？你們」
「我們想離開」我說。
「走那邊」手指指向我們右邊看似後門的東西。
於是我們就過去。
去到又有另一個車站嬸嬸問：「你們有票嗎？」粗豪且沒禮貌的語氣。
我心諗：我走仲乜要check飛？入o黎就話o者～如果我「黎」手掉左咁點算？
好彩我有，check完佢就放我地走。
從這件事+之前和之後問路的事件中，我們覺得北京的公務員頗冇禮貌的！冷漠又不helpful！

冷漠的車站嬸嬸，跟天氣有關嗎？

北京的警車，好得意噃 (原來佢地都係叫警察唔叫公安的)

桔子酒店（西直門２店）

從桔子酒店轉去威斯汀酒店，車程快到嘔，
中途我讀錯了第二個字，就是個「乙」字。
想知道司機叔叔點教我讀返o岩？
請看這篇
http://hk.myblog.yahoo.com/AABB-happyTravel/article?mid=5026

去到威斯汀，無論是酒店的大堂跟房間設備都令我十分滿意。
五星級果然是五星級，最令我驚喜是那張床，舒服到呢．．．
同Aleenta果張有得揮！我直頭想帶佢返香港。

房間竟然有咖啡機＠＠

勁勁勁勁勁舒服ｏ既床，AA+

放低晒行李，我們又再上路。
下一站係南鑼鼓巷，遇著塞車時間，塞左９個字先到。

下一篇

北京凍到震之旅 Day2b (南鑼鼓巷)