2010年1月16日星期六

北京凍到震之旅 Day3a (天安門+故宮)

Day3　(2009.12.26)
行程: 天安門->故宮->王府井大街->花家怡園->鳥巢+水立方->煙袋斜街->什剎海

今日都好凍，訓到唔願起身．．．11點幾先出發去玩。
日日都搭的士，見故宮咁近，今日就試下搭地鐵啦！
睇地圖一早都知地鐵站好遠架哪，問bellboy地鐵站係邊，佢指左條路，說步行15分鐘左右就到了。對我o黎講都真係幾遠。

我地住的五星級大酒店威斯汀

走在左金融大街，到處都是大銀行及保險公司大廈，連北交所都在這裡，就像香港的中環區。不過我對金融大街唯一的印象，就是「飛劍」，遍地濃淡乾濕的痰積，好不噁心！你要好小心先可以避開它們！所以我覺得，金融大街應該改名做「飛劍大道」，又有氣勢，又貼切。真係唔明點解中國人可以咁多痰，多到唔周街吐唔舒服。

北京交易所 - 北交所

行左好遠，終於見到百盛購物中心，地鐵站應該就在附近
但係搵左好耐．．．都見唔到類似「地鐵站」o既物體！
結果去左對面馬路果個。

北京o既地鐵站有保護色的，同香港地鐵站「明顯」o既設計特色真係差得遠！
又一次證明北京o既計設真係好唔user friendly。

售票機，無論去到邊都係２蚊，真係好抵！

來了幾天，感覺到這裡的安檢真是嚴密得很！
許多公眾地方都需要安檢，天安門﹑故宮﹑鳥巢等地標性建築一定走唔甩，
就連出入地鐵站都一定要過Ｘ光機。
講真，真係好唔方便。

北京地鐵站不像香港，某d站需要行好長o既隧道才到月台，某d站轉車又要行好遠先去到另一個月台，唔似得香港咁方便，過對面就轉到車。

北京的「山手線」ＸＤ

到了前門站，天安門廣場呢？搵左好耐先搵到佢o既蹤影，睇o黎...我又搭錯車了。
原來如果想最快時間去到天安門及故宮，應該去天安門東站／天安門西站落，而唔係前門站。前門都去到，不過要行一段好遠o既路，對於趕時間o既人就唔適合哪！

一出站，就見到好多建築物

天安門廣場真係好大好大．．．要行好遠先去到

天安門廣場兩旁的燈柱，通通都裝上監視器

天安門同故宮俾我的感覺都好震撼，自問不是愛國的人，
但是當我親眼看見這兩棟建築物，心裡面都不其然肅穆起來。

來到了天安門廣場前，拍了幾張「到此一遊」的照片後，我們便往故宮出發！

解放軍無啦啦做左人肉紙版公仔

點解企咁遠？因為佢同我講：「不要靠太近啊！」
所以你見到我地中間有條"喇"

因為晏左o黎，所以好多好多人(假日都可能有關係的)

皇帝帽同格格帽

首先去買入場票，淡季成人￥40
排隊o既時候我仲買左本故宮圖解歷史書仔￥5，見好多人買所以我都買一份。
故宮咁大，下下睇書仔解讀歷史咪有排睇？唔洗驚，入場後有「自動導覽解說器」租用的，導覽器能探測到你所在的位置，無論你走到哪裡都有專人解說故宮各處的歷史，而且除了英﹑粵﹑普之外，還有其他外語一共22種可供選擇，照顧周到。不過租金方面，中國人是有優惠的啊，普通話和廣東話￥10，其他語言就要￥40，按金則每個￥100。

我覺得依個導覽器幾方便划算，仲有條繩俾你掛頸唔驚整唔見。
不過有時神神地，detect錯左位置，去到最尾，仲冇晒聲tim！

午門 - 睇電視成日講午門抄斬就係依度哪!

依個係故宮的地圖，皇宮咁大，幾個鐘梗係行唔晒啦～
我地主要o既路線都係中路直線去到尾，由午門入，神武門離開。

越過午門之後穿過太和門，我地睇到皇帝上朝o既地方太和殿，皇帝休息o既地方中和殿，同以前讀書人最希望去o既科舉試場保和殿。

行入太和殿範圍，講解器就介紹左依４樣野：日晷，銅龜，ｘｘ，嘉量
(ｘｘ係因為我唔記得左個名^^" 只係記得佢係用來點香薰用的)

太和殿，就是皇帝每朝上朝辦公o既地方。

見唔見到張龍椅？因為太多人了，所以我在側門睇，影d相都係45度。

太和殿的背面

太和門之後就是中和殿&保和殿

中和殿是皇帝休息的地方

保和殿就是皇帝出席大典式祭祀前o既更衣室，清代成為宴客場地，順治及康熙曾用作寢宮，至於乾隆就將科舉試場搬到依度，所以以前讀書人最希望去保和殿。

保和殿對出的空地，就是宣佈成績o既地方，一眾考生站在此等皇帝宣召誰是狀元(第一)﹑榜眼(第二)﹑探花(第三)。中舉的讀書人仲可以恩許由御道行出午門，是很大的榮譽。

這塊石碑, 花左好多人力物力先可以帶到o黎依度架

乾清宮就係皇帝o既寢室，直到雍正上位，寢室就搬到養心殿。

坤寧宮是皇后的寢室，交泰殿則是皇后的辦公室。

交泰殿內

跟住落o黎o既相片都是千篇一律的皇宮面貌，所以都唔post太多出o黎哪，有機會大家去親身感受下啦！

坤寧宮之後，就是御花園。

一級古樹

依棵咁得意o既樹就係「連理枝」了

堆秀山

依個係「木變石」，上面果舊真係石o黎架。好神奇！
話時話依舊木驟眼睇有ｄ似人樣喎～

除左皇宮之外，仲有好多其他小宮殿做展覽館，擺放以前皇帝o既收藏品，有繪畫鐘錶銅器瓷器玉器金器等等，實在太多。皇宮太大了，所以我地冇行晒，只係隨便揀左幾個參觀。我地發現，好多珍寶都係屬於乾隆的，哈哈，依個皇帝最貪玩，聽過佢ｄ史蹟，就知道佢係最識享受的清朝皇帝。
因為太多相，所以我整左段slide，方便大家睇。