華東日全蝕之旅 Day5 (同仁堂, 天祿城, 濱江大道)

Day5 (2009-7-23)
今日行程：上海 [同仁堂﹑上海環球金融中心﹑天祿城]

終於來到最後一天, 這天我格外準時, 7點9便落到餐廳食早餐, 平時我一定是最遲的一個, 阿Bob見到我好出奇, 以為係見鬼。

點解咁神心? 其實係因為我之前上網聽過人講依度d早餐好好味, 所以我特登早d起身食XD 不過我錯了, 早餐選擇好多, 但好吃的冇乜幾多......只能說:「國內人的口味真獨特」

除了這碟之外我就冇食過其他野了

最後一日冇咩景點, 去指定景點影下相, 同埋去同仁堂+天祿城。前者是中藥行, 後者是貔貅(音皮休)廠。

上海同仁堂

一入大堂就見到隻貓貓不停撩人玩, 佢完全唔驚人, 又會嗲你

miki玩兩玩直頭抱起左佢tim! 哈

入到間房坐低, 有個中醫師出o黎講野, 教我地養生之道

跟住無啦啦拎d中藥水俾我地浸腳, 仲派左d人幫我地按腳tim!

當按腳o既途中...就有一班中醫入o黎, 幫我地把脈, 跟住佢就會講你有d咩唔妥, 然後開藥方俾你, 叫你買藥。不過佢唔係人人都把架, 通常佢都係揀d年紀比較大d o既人, 我同A先生, 佢地眼尾都唔望下。其實d藥材都唔平架...最低消費都幾百, 最貴去到幾千蚊都有, 不過買o既人真係唔多~

最後的午餐在帝龍海鮮舫食, 香港有個珍寶海鮮舫, 上海又有個帝龍海鮮舫, 乜都抄到足!

帝龍海鮮舫在橋下面

今餐主打係魚翅撈飯, 但係個魚翅撈飯係唔好食架:p
其他餸都唔係特別出色, 冇話邊個特別好食

魚翅撈飯, 個汁甜甜地, 同d魚翅唔係好夾
最後我剩係食晒d魚翅就冇食

海鮮舫入面有張龍椅, 我地走過去扮皇上皇后XD

食完飯就去天祿城

之前講過天祿城即係貔貅(音皮休)廠, 貔貅是中國十大神獸之一, 在中國風上學上有招財的作用。

我地入到去, 有個女人出o黎講風水, 佢介紹左世界各地好多華人地方都有用到貔貅。又講左好多關於家宅五行o既野, 只要你俾屋企人o既生肖, 同埋屋企大門口o既方位佢, 佢就可以睇下你個家宅好唔好, 邊個最搵到錢, 邊個最辛苦, 邊個最懶, 連miki家姐嫁得好佢都知, 真係勁! 阿Bob話:「真係好勁, 咁準o既?」個女人話:「唔係準, 而係根本就係咁」我地幾個最後生, 但係竟然係最後走o既, 真係搞笑, 哈哈。

在天祿城門口見到下年上海世博的中國展館圖, 好有特色:)

都唔明點解次次逗留在購物點都係最耐的, 下下都兩三個鐘。帶我地去景點就半個鐘起一個鐘止。雖然係咁, 但係兩個景點都獲益良多o既~~ 團費咁平, 已經賺左架哪~~

今日o既指定景點包括濱江大道, 濱江大道就像香港的星光大道, 可以遠眺對岸的景色。但是上海的空氣比香港還要差, 灰朦朦一片

老實講我真係一d都唔覺得靚, 完全影唔落手!
但是一場來到, 巡例都影番張啦!

「1, 2, 3, 笑~~」

跟住係廁所位, 行幾步走到一個唔知咩咩隧道o既入口位, 落到下面, 除左搵到洗手間之外, 仲搵到好多得意野。

到底有幾奇妙呢? XD

毛主席語錄, 仲有英文版tim!

有人幫襯喎~~估下係邊個?

就係miki哪~~

好睇好睇~~

上返車, 又車我地去另一個影相位, 只係落一落車影, 大概逗留10分鐘。

隔離依個好似開瓶器o既, 就係上海環球金融中心

上海真係好似香港的, 不過似還似, 上海的貧富懸殊問題非常嚴重, 貧窮的市民仍然過著倒夜香的生活。我想上海要追上香港的繁華, 還要加倍努力。

5點鐘來到機場, 8點鐘準時上機, 10點半準時降落香港國際機場。旅程就此結束。
回到不想面對的現實世界, 又要努力工作, 努力賺錢, 迎接下一次旅程。

上海機場個建築好奇怪...天花好似一枝枝針對住你, 令人好唔舒服。肯定又係d風水野!

原來上海機場有好多野係唔帶得的, 連寄倉都唔可以!!!
有咩係有可能賴野o既呢? 留意哪! 打火機, 電池, 火柴, 酒, 依幾樣咁common o既都係唔得架! 機場入面有免稅店有酒賣, 但係佢有得賣, 卻唔俾你帶走的! 雖然唔明點解咁奇怪...但係大家真係要小心d~

臨上機之前...我地又開餐XD

手機自助充電站, 真係有趣! 有好多牌子o既插頭, 揀o岩就可以充電。雖然這種充電方法好傷電池, 但係用來應急真係好幫得手, o岩晒d商務旅人。

上海世博會吉祥物, 唔得意都要影!

回程的飛機餐, 有個新鮮熱辣的餐包, 是後來才俾我地的, 好味過去程果個凍冰冰硬掘掘餐包多多聲。

好好味好好味o既雪糕^3^

中國東方航空的飛機餐, 回程竟然有雪糕食@@ 仲要係雀巢的摩爵芭菲杯 wow
開心到我呢...A先生:「唔好俾我估中, 你一定會因為依杯雪糕而下次再搭依間航空公司」B小姐:「其實中國東方航空都幾好丫, 下次可以搭番依間, hohoho」

((完))

返回第一天　
華東日全蝕之旅 Day1 (杭州：西湖之夜)